९ माघ, काठमाडौं – नेपाली कांग्रेसका सभापति शेरबहादुर देउवाले सरकारको मुख्य भूमिका व्यवस्थापक र संयोजकको हुनुपर्ने भन्दै व्यापार र उद्योगमा संलग्न नहुने स्पष्ट पारेका छन्।
बुधबार सानेपामा आयोजित कांग्रेसको आर्थिक नीति तथा योजना विभागद्वारा आयोजित गोष्ठीमा बोल्दै देउवाले भने, “व्यापार गर्ने काम व्यापारीको हो, उद्योग खोल्ने जिम्मा उद्योगपतिको हो। सरकार व्यापार वा उद्योगमा प्रत्यक्ष रूपमा संलग्न हुनु उचित होइन। गिरिजाबाबुले निजीकरण गर्दा धेरै विरोध भयो, तर त्यो निर्णय सही थियो।”
एमसिसी सम्झौता संसदबाट पारित गर्दा भएका विवादको स्मरण गर्दै देउवाले अहिले त्यसले नेपालको विकासमा सकारात्मक योगदान दिएको बताए। उनले भने, “एमसिसी पास गर्दा विरोध भयो, तर अहिले हेर्दा थाहा हुन्छ, त्यो नेपालका लागि फाइदाजनक छ। यो अनुदान हो, ऋण होइन।”
देशलाई ऋणको जालमा पार्न नहुनेमा पनि देउवाले जोड दिए। “ऋण लिनु सही हो कि होइन भन्ने बहस भइरहन्छ। तर सही उपयोग गर्न सके ऋणले पनि फाइदा दिन्छ,” उनले भने।
सभापति देउवाले वैदेशिक सहयोगलाई प्रभावकारी रूपमा परिचालन गर्दै देशको दीर्घकालीन विकासका लागि उपयोग गर्नुपर्नेमा पनि जोड दिए।
