२० साउन, काठमाडौं – नेपाल विद्युत् प्राधिकरणको सञ्चालक सदस्यमा पूर्वसचिव देवेन्द्र कार्की र पूर्वसहसचिव महेन्द्रबहादुर गुरुङलाई नियुक्त गरिएको छ ।
ऊर्जा, जलस्रोत तथा सिँचाई मन्त्रालयले शुक्रबार नै कार्की र गुरुङलाई नियुक्त गरिसकेको जनाएको छ ।
मन्त्रीस्तरीय निर्णयबाट कार्की र गुरुङलाई प्राधिकरणको सञ्चालक समितिका सदस्यमा शुक्रबार नै नियुक्त गरिएको मन्त्रालयका प्रवक्ता नवीनराज सिंहले बताए । ‘यसअघिका दुई सदस्यलाई लिखित स्पष्टिकरण माग गरिएको थियो, उहाँहरुले स्पष्टिकरण पनि बुझाउनु भयो,’ उनले भने, ‘उहाँहरुले बुझाउनु भएको स्पष्टिकरण चित्त नबुझेपछि शुक्रबार नै मन्त्रीस्तरीय निर्णयबाट पदमुक्त गर्यौं । नयाँ सदस्यलाइ पनि नियुक्त गरिसक्यौं ।’
कार्की पूर्व उर्जा तथा भाैतिक सचिव हुन् ।गुरुङ विद्युत् विकास विभागको पूर्वमहानिर्देशक र पञ्चेश्वर विकास प्राधिकरणका पूर्व सीईओ हुन् । गुरुङलाई उपभाेक्ताका तर्फबाट र कार्कीलाई उर्जा विज्ञका रुपमा नियुक्त गरेकाे मन्त्रालयले जनाएको छ ।
मन्त्रीस्तरीय निर्णयबाट शुक्रबार नै प्राधिकरणको सञ्चालक समिति सदस्यबाट भक्तबहादुर पुन र कपिल आचार्यलाई हटाएको थियो ।
