२८ मंसिर, काठमाडौं — नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले कुलमान घिसिङले गुन बिर्सिएको टिप्पणी गरेका छन्। कुलमानले ‘जुन थालमा खायो, त्यही थालमा छेद हाल्न खोजेको’ भन्दै प्रचण्डले त्यसो नगर्न चेतावनी पनि दिएका छन्।
कर्णाली प्रदेशको राजधानी सुर्खेतमा शनिबार आयोजित एकता सन्देश सभालाई सम्बोधन गर्दै प्रचण्डले भने, ‘अहिले कुलमानले गुन बिर्सिएर जुन थालमा खाए त्यही थालमा छेद हाल्न खोज्याछन्। तिनले त्यसो नगरुन् भन्न चाहान्छु। कुलमानको बुद्धि फिरोस्।’
नेपाल विद्युत् प्राधिकरणका पूर्व कार्यकारी निर्देशक कुलमान घिसिङ जेनजी आन्दोलनपछि बनेको अन्तरिम चुनावी सरकारमा ऊर्जा, भौतिक पूर्वाधार तथा शहरी विकास मन्त्री छन्। मन्त्री पदमा रहँदै उनले उज्यालो नेपाल पार्टीमार्फत राजनीतिमा प्रवेश गरेका छन्।
यसै सन्दर्भमा प्रचण्डले वैगुनी व्यवहारले कुलमानले पार नपाउने र जनताले पनि माफ नगर्ने टिप्पणी गरे। ‘यस्तो बैगुनी भएर तिनले पार पाउने छैनन्। नेपाली जनताले यसो गरे भने तिनलाई धेरै माफ दिन्छ जस्तो मलाई लाग्दैन,’ प्रचण्डले भने।
आफू प्रधानमन्त्री हुँदा नेपाल विद्युत् प्राधिकरणमा कुलमानलाई नियुक्त गरेको र त्यसकै कारण लोडसेडिङ हटाउन सम्भव भएको तर कुलमानले त्यो कुरा बिर्सिएको प्रचण्डको भनाइ छ।
‘प्रधानमन्त्रीको हैसियतले मैले टिपेर ल्याएँ, यो मान्छे राम्रो छ भनेर,’ प्रचण्डले भने, ‘उनले पहिला–पहिला भनेको पनि हो फेरि प्रचण्डले हो मलाई बनाएको भनेर, कुरा बिर्सिएर अहिले लाजमर्नु। म यो भन्दा बढी भन्दिनँ बिचरा।’