४ माघ, काठमाडौं – प्रधानमन्त्री केपी शर्मा ओलीले स्वदेशमै फलाम खानी र मल कारखानाजस्ता ठूला उद्योगहरू स्थापना हुँदै गरेको र बन्द भएका उद्योगहरूलाई पुनर्जीवित गर्न नयाँ ढाँचामा सञ्चालनको तयारी भइरहेको बताएका छन्। उनले उत्पादित ऊर्जाको खपतबारे कुनै चिन्ता लिनु नपर्ने स्पष्ट पारे।
स्वतन्त्र ऊर्जा उत्पादक सङ्घ (इप्पान) को रजत जयन्तीका अवसरमा आयोजित कार्यक्रममा प्रधानमन्त्री ओलीले ऊर्जा खपतका क्षेत्रहरू स्वाभाविक रूपमा विकास हुने भएकाले ऊर्जा बिक्रीको विषयमा अनावश्यक चिन्ता गर्न नपर्ने धारणा राखे। उनका अनुसार सरकारले आगामी ११ वर्षभित्र २८,५०० मेगावाट विद्युत् उत्पादन गर्ने कार्ययोजना तयार गरेको छ।
प्रधानमन्त्री ओलीले भने, “हामीसँग आठवटा औद्योगिक क्षेत्र छन्। धौबादीमा फलाम खानी र मल कारखाना स्थापना गर्दैछौं। दैलेखमा ग्यास उत्पादन सुरु हुँदैछ। पुनर्जीवन पाउँदै गरेका उद्योगहरूले ऊर्जा खपत गर्नेछन्।”
ऊर्जा उत्पादन र खपतको सन्तुलन कायम गर्न सरकार प्रतिबद्ध रहेको उल्लेख गर्दै प्रधानमन्त्रीले ऊर्जा उत्पादकहरूको योगदानको प्रशंसा गरे। “तपाईंहरू लगानी गर्नुस्। अरूलाई बाटो खोल्नुपर्ने अवस्था छैन। लगानीले नै देशलाई अघि बढाउँछ,” उनले भने।
साथै, प्रधानमन्त्री ओलीले जनतालाई सेवा दिन र विकासलाई गति दिनका लागि सरकार कानुनी सुधारमा सक्रिय रहेको जानकारी दिए। उनले विभिन्न कानुनमा संशोधन गर्न अध्यादेश ल्याइएको उल्लेख गर्दै १५ दिनभित्र संसद्को अधिवेशनमा ती विषय प्रस्तुत गरी दुई महिनाभित्र पारित गरिने बताए।
देशलाई आधुनिकीकरण र आत्मनिर्भरतातर्फ अघि बढाउन ऊर्जाको उत्पादन र खपत दुवैमा जोड दिने सरकारको योजनालाई उनले स्पष्ट रूपमा प्रस्तुत गरे।
