१५ कात्तिक, काठमाडौं – वन तथा वातावरणमन्त्री ऐनबहादुर शाही ठकुरीले मानिसको गलत अभ्यासले प्रकृतिलाई हानी पुर्याई द्वन्द्वसमेत निम्त्याउने भएकाले त्यसलाई रोक्नुपर्ने बताएका छन् ।
कोलम्बियाको काली सहरमा जारी जैविक विविधता महासन्धिसम्बन्धी १६औं अन्तर्राष्ट्रिय सम्मेलन (कोप–१६) मा सम्बोधन गर्ने क्रममा मन्त्री ठकुरीले उक्त भनाई राखेका हुन् ।
सो अवसरमा मन्त्री ठकुरीले समुदायमा आधारित प्रकृति संरक्षणमा नेपालले सफलता हासिल गरेको उल्लेख गर्दै सफलता साझा गर्न पाएकोमा खुसी समेत व्यक्त गरे ।
‘द्वन्द्व, हिंसा र अशान्तिले प्रकृति र मानिसहरूलाई हानि पुर्याउँछ । हामीले हाम्रा अभ्यासबाट उत्पन्न हुने द्वन्द्वलाई रोक्नुपर्छ,’ उनले भने, ‘त्यसैले समुदायमा आधारित संरक्षणमा नेपालको सफलता र सामाजिक–राजनीतिक शान्ति निर्माणमा यसको योगदान साझा गर्न पाउँदा म खुसी छु ।’
साथै प्रकृति र शान्ति सेसनलाई सम्बोधन गर्ने क्रममा उनले नेपाल गौतम बुद्धको जन्मभूमि रहेकाले उनको सन्देश अहिले पनि सान्दर्भिक रहेको बताए ।
‘बुद्धले भनेजस्तै प्रकृतिको सदुपयोग गर, जसरी मौरीले फूलबाट पराकण संकलन गर्छ, न त यसको सौन्दर्य प्रदूषित गर्छ, न सुगन्धमा कमी आउँछ । प्रकृति र शान्तिको यो सन्देश आज पनि सान्दर्भिक छ,’ मन्तव्यलाई जोड्ने क्रममा उनले भने, ‘यसले द्वन्द्वका आधारभूत कारण : स्रोतको अभाव र बहिष्कारलाई सम्बोधन गरेको छ । त्यसैले स्रोतको संरक्षण, उपयोग र व्यवस्थापनमा सामाजिक न्याय र समानताको प्रवर्द्धन गरेर नेपालमा शान्ति सम्भव भएको थियो ।’
