४ कात्तिक, काठमाडौं – नेकपा एमालेका महासचिव शंकर पोखरेलले पूर्वगृहमन्त्री तथा रास्वपाका सभापति रवि लामिछानेमाथि चलिरहेको अनुसन्धान संसद्को समेत साझा सरोकार विषय भएकाले यसलाई सरकारविरुद्ध जोड्न नमिल्ने बताएका छन् ।
संसदीय छानबिन विशेष समितिले समेत औंल्याएको विषयमा सरकारी निकायले अनुसन्धान अघि बढाउँदा रास्वापाका नेता कार्यकर्ताले सरकारविरुद्ध नाराबाजी गरेपछि पोखरेले यस्तो धारणा राखेका हुन् ।
रास्वपाका सांसद समेत सहभागी भएको संसदीय समितिले लामिछाने तत्कालीन गोर्खा मिडियाको प्रबन्ध निर्देशक भएका बेला सहकारीको रकम अपचलन गरेको निष्कर्ष निकालेको थियो । उक्त निष्कर्ष र पीडितहरूको उजुरी समेतको आधारमा प्रहरीले लामिछानेमाथि ठगी र संगठित अपराधमा अनुसन्धान अघि बढाएको हो ।
एमालेको सचिवालय बैठकपछि महासचिव पोखरेलले लोकतन्त्रमा जनप्रतिनिधिमुलक संस्था सर्वोच्च हुने भएकाले यसलाई सबैले मान्नुपर्ने बताए । ‘अनुसन्धानको आफ्नो प्रक्रिया हुन्छ । लोकतन्त्रमा जनप्रतिनिधसहरूो संस्था आफैंमा सर्वोच्च हो । संसदीय छानबिन समितिले औंल्याएका विषय सम्बन्धित निकायले अनुसन्धान गर्छन्’ महासचिव पोखरेलले भने,’संसद्को साझा सरोकारको विषय भएकाले यसमा सरकार भर्सेज हुनु आवश्यक छैन । जोकोही छानबिनको प्रक्रियामा आउनुपर्छ । छानबिनको क्रममा अमुक व्यक्तिलाई कार्बाही र सफाइ दिनुपर्छ भन्नेछैन ।’
