१८ पुस, काठमाडौं — कञ्चनपुरमा उद्धार ढिलाइ हुँदा नदीमा फसेको बाघको बच्चा (डमरू)को ज्यान गएको छ।
दोधारा चाँदनी नगरपालिका–१ स्थित चाँदनी गैरीशंकर सामुदायिक वन क्षेत्र नजिक जोगबुढा नदीमा फसेको अवस्थामा रहेको डमरूको मृत्यु भएको हो। बुधबार बिहान नदीको हिलो र पानीमा फसेको अवस्थामा डमरू भेटिएको थियो।
स्थानीयले तत्कालै डिभिजन वन कार्यालय र शुक्लाफाँटा राष्ट्रिय निकुञ्जलाई जानकारी गराए पनि सम्बन्धित निकायबाट उद्धारमा ढिलाइ भएको स्थानीयको गुनासो छ। मृत्यु भएको डमरूको उमेर करिब दुई महिना रहेको जनाइएको छ।
डिभिजन वन कार्यालय कञ्चनपुरका प्रमुख सुरेशचन्द्र डिसीले राष्ट्रिय प्रकृति संरक्षण कोष र शुक्लाफाँटा राष्ट्रिय निकुञ्जको लापरवाहीका कारण डमरूको मृत्यु भएको आरोप लगाए। उनले डमरू नदीमा फसेको जानकारी पाएपछि आफू उद्धारका लागि घटनास्थल जान खोज्दा सशस्त्र प्रहरीले निकुञ्जका वार्डेनको अनुमति नभएको भन्दै रोकेको बताए। निकुञ्जले न आफू उद्धारमा सक्रियता देखाएको र न वन कार्यालयको टोलीलाई जान दिएको कारण डमरूको ज्यान गएको उनको दाबी छ।
तर, शुक्लाफाँटा राष्ट्रिय निकुञ्जका प्रमुख संरक्षण अधिकृत चन्द्र शेखर चौधरीले उद्धारमा ढिलाइ भएको भन्ने आरोप अस्वीकार गरेका छन्। उनका अनुसार दिउँसो करिब २ बजे डमरू नदीमा फसेको सूचना पाएपछि चिकित्सकसहितको प्राविधिक टोली घटनास्थल पुगेको थियो।
उनले बघिनी पनि वरपर रहेकोले माउले नै डमरू लिएर जान सक्छ भन्ने सम्भावनामा प्राविधिक टोलीले रेकी गर्दै प्रतीक्षा गरेको बताए। ‘उद्धार टोली नगएको भन्ने कुरा गलत हो। चिकित्सकसहितको टोली समयमै पुगेको थियो,’ चौधरीले भने, ‘माउ आसपास भएकाले बच्चा माउले नै लैजाओस् भनेर रातिसम्म कुरेर बसेका थियौँ, तर दुर्भाग्यवश डमरूको मृत्यु भयो।’
शुक्लाफाँटा राष्ट्रिय निकुञ्जमा हाल ४४ वटा बाघ संरक्षणमा रहेका छन्।