६ माघ, काठमाडौं–नेपाली कांग्रेसका प्रवक्ता प्रकाशशरण महतले माओवादी केन्द्रको अस्थिर चरित्रका कारण कांग्रेस र एमालेबीच सहकार्य भएको बताएका छन्।
उनका अनुसार, वर्तमान सरकारले आफ्नो कार्यकाल पूरा गर्नेछ, र आगामी चुनावी सरकारको नेतृत्व कांग्रेस सभापति शेरबहादुर देउवाले गर्नेछन्।
आइतबार दिल्लीमा नेपाली जनसम्पर्क समितिले आयोजना गरेको कार्यक्रममा महतले सात बुँदे सहमतिको आधारमा सरकारले काम गरिरहेको स्पष्ट पारे। “कांग्रेस र एमालेबीचको समझदारीले सरकारलाई प्रभावकारी बनाएको छ,” उनले भने।
भारतमा रहेका नेपालीहरूको योगदानको प्रशंसा गर्दै महतले प्रवासी नेपालीहरूले नेपालको राजनीतिमा अर्थपूर्ण भूमिका खेलेको उल्लेख गरे। उनले भने, “यहाँ रोजगारी र अन्य कारणले बसे पनि तपाईंहरूको भूमिका महत्वपूर्ण छ। निर्वाचनमा सहभागी हुन देश फर्किएर मतदान गर्न आग्रह गर्दछु।”
त्यसैगरी, महतले पार्टीभित्र देखिएको व्यक्तिवादी सोच र आफूकेन्द्रित प्रवृत्तिले विभिन्न समस्या निम्त्याएको बताए। पार्टीमा एकता र जिम्मेवारीको भावना विकास गर्नुपर्नेमा उनको जोड थियो।
