११ असोज, काठमाडौं – काठमाडौं प्रहरीले चाडपर्वलक्षित सुरक्षा योजना सार्वजनिक गरेको छ ।
प्रहरीले दसैँ, तिहार र छठ पर्वमा हुनसक्ने अपराधका घटना रोक्न सुरक्षा योजना सार्वजनिक गरेको हो ।
काठमाडौं प्रहरी प्रमुख एसएसपी वसन्त रजौरेले शुक्रबार पत्रकार सम्मेलन गर्दै सुरक्षा योजना सार्वजनिक गरेका हुन् ।
प्रहरीले यस सुरक्षा योजनाका लागि ‘नागरिक स्वयंको सावधानी, प्रहरीको निरन्तर निगरानी, बनाऔं सुरक्षित राजधानी’ नारा तय गरेको छ ।
प्रहरीले चाडपर्वमा हुनसक्ने विभिन्न अपराधहरुलाई वर्गीकरण गरेर सुरक्षा योजना बनाएको हो । लुटपाट तथा कुटपिट, चोरी तथा स्न्याचिङ, डकैती, सवारी दुर्घटना, तस्करी, जुवातास, अवैध मदिरा बिक्री वितरण, मदिरा सेवन गरी झैझगडा, ट्राफिक नियम उल्लंघन, आगजनी तथा बिस्फोटन, ड्रिंक एन्ड ड्राइभ, हिट एण्ड रन, चिट्ठाको प्रलोभनमा ठगी, कृत्रिम अभाव तथा कालोबजारी, नाका स्टेशनमा बाहिरिनेको चापमा हुने अवैध धन्दा, महँगो भाडा असुली, मदिराका कारण हुने अपराध, धार्मिक तथा किनमेल स्थलमा हुने पाकेटमारी र बन्द पसल तथा खाली घरहरुमा हुने चोरीलाई प्रहरीले सम्भावित अपराध मानेको छ ।
दसैँ तिहारलाई लक्षित गर्दै १४ वटा क्षेत्रहरू विभाजन गरी सुरक्षा दिने योजना प्रहरीले बनाएको छ। जसको कमाण्ड डिएसपीले गर्ने र १० जनाको टोली रहने एसएसपी रजौरेले जानकारी दिए ।
त्यस्तै पैदल गस्तीलाई पनि दुई वटा वर्गीकरण गरिएको छ । दुई वटा लामो रूटहरूमा तीन दिने र छोटो दुरीका ४२ वटा रूटमा एक दिने गस्ती रहने पनि प्रहरीले जनाएको छ ।
त्यस्तै क्यामरासहित बोकेको इ-क्युआरटी ७६ वटा सवारी गस्ती रहनेछ भने २४ वटा मोबाइल गस्ती रहने प्रहरीले जनाएको छ । सूचना संकलन गर्न ३८ वटा टोली सादा पोशाकमा खटिनेछन् । खोज तलासका लागि २८ वटा र २२ वटा एम्बुस टोली रहने प्रहरीले जनाएको छ ।
नाकाहरुमा हरेक दिन कुकुर पनि परिचालन गरिने, पर्चा पम्प्लेटमार्फत जनचेतना गर्ने प्रहरीको तयारी छ । कलंकी, बल्खु सून्धारा, पूरानो बसपार्क, गोंगबु, नयाँ बसपार्क, चाबहिल, कोटेश्वर, हल्चोकलगायत १२ स्थानमा यात्रु सहायता कक्ष खडा गरिने भएको छ ।
त्यसैगरी ड्रोन क्यामेरामार्फत पनि सर्भिलेन्स गरेर निगरानी गरिने प्रहरीले जनाएको छ । यसका साथै सिसिटिभीमार्फत पनि सर्भिलेन्स हुनेछ । कुनै घटना भइहालेमा ५ देखि १० मिनेटभित्र प्रहरी पुग्ने गरी व्यवस्था मिलाइएको पनि एसएसपी रजौरेले जानकारी दिए । यी सबैका लागि काठमाडौं जिल्लामा मात्रै ३ हजार ७ सय ६५ प्रहरी खटाइनेछ ।
