१७ असार, काठमाडौं — नेपालभर मनसुनी वायु सक्रिय भएको छ। जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार मनसुनी वायु देशको पश्चिमी सीमासम्म पुगेको छ।
महाशाखाले बुधबार गण्डकी र लुम्बिनी प्रदेशका बाँकी भू-भागसँगै कर्णाली र सुदूरपश्चिम प्रदेशका सम्पूर्ण क्षेत्रमा पनि मनसुन विस्तार भएको जनाएको छ। यससँगै यस वर्षको मनसुन देशभर पूर्ण रूपमा फैलिएको छ।
नेपालमा सामान्यतया जुन १३ तारिखदेखि पूर्वी भू-भागबाट मनसुन प्रवेश गरी करिब एक साताभित्र देशभर फैलिने गर्छ। तर, यस वर्ष मनसुन औसत समयभन्दा ६ दिन ढिलो अर्थात् असार ५ गते (जुन १९) पूर्वी नेपालबाट प्रवेश गरेको थियो।
सुरुआतमा कोशी प्रदेशका केही क्षेत्रमा सीमित रहेको मनसुन असार ८ गते (जुन २२) सम्म आइपुग्दा कोशी प्रदेशका सबै भू-भाग, मधेस, बागमती, गण्डकी प्रदेशका केही क्षेत्र तथा लुम्बिनी प्रदेशको पूर्वी भागसम्म विस्तार भएको थियो। यस वर्ष देशभर मनसुन फैलिन कुल १२ दिन लागेको महाशाखाले जनाएको छ।
हाल लुम्बिनी, कर्णाली र सुदूरपश्चिम प्रदेशमा अधिकांश स्थानमा बदली रहेको छ भने कोशी, मधेस, बागमती र गण्डकी प्रदेशमा सामान्य बदली छ। अहिले बागमती, लुम्बिनी, कर्णाली र सुदूरपश्चिम प्रदेशका थोरै स्थान तथा कोशी प्रदेशका एक-दुई स्थानमा मेघगर्जन र चट्याङसहित हल्कादेखि मध्यम वर्षा भइरहेको छ।
आज दिनभर देशभर पूर्णतया बदली रहने पूर्वानुमान गरिएको छ। महाशाखाका अनुसार हिमाली क्षेत्रका केही स्थानमा मेघगर्जन र चट्याङसहित मध्यम वर्षा तथा हिमपात हुन सक्नेछ। पहाडी क्षेत्रका धेरै स्थानमा मेघगर्जन, चट्याङसहित मध्यम वर्षा र हिमपात तथा तराईका केही स्थानमा मध्यम वर्षाको सम्भावना रहेको छ।
आज विशेषगरी कोशी, बागमती, गण्डकी, लुम्बिनी र कर्णाली प्रदेशका पहाडी भू-भागका एक-दुई स्थानमा भारी वर्षा हुन सक्ने महाशाखाले जनाएको छ।
मौसम पूर्वानुमान महाशाखाले मौसमको अवस्थाको निरन्तर निगरानी गरिरहेको र नियमित रूपमा मौसमसम्बन्धी सूचना अद्यावधिक गर्दै जाने जनाएको छ। साथै, वर्षाका कारण हुन सक्ने जोखिमलाई ध्यानमा राख्दै सबैलाई मौसमसम्बन्धी पछिल्लो जानकारी लिन र आवश्यक सतर्कता अपनाउन आग्रह गरेको छ।
