३ बैशाख , काठमाडौं – सरकारले संघीय संसद्को हिउँदे अधिवेशन अन्त्य गरेको छ ।
प्रमुख प्रतिपक्षी कांग्रेसले सहकारी बचत अपचलनमा संसदीय छानबिन समिति माग गरिरहेका बेला अधिवेशन अन्त्य गर्नुलाई कांग्रेसले आपत्ति जनाएको छ ।
संसदीय समिति गठनको माग छल्न सरकारले संसद् अधिवेशन अन्त्य गर्ने निर्णय गरेको कांग्रेस संसदीय दलको आइतबारको बैठकले निष्कर्ष निकालेको छ ।
अप्रत्याशित रूपमा संसद् बन्द गरेर सरकार संसदीय समिति गठनको मागबाट भागेको आरोप लगाउँदै कांग्रेसले उक्त मागालाई आगामी अधिवेशनको सुरुआतदेखि पुनः चर्काउने घोषणासमेत गरेको छ ।
कांग्रेस बैठकका निर्णय सुनाउँदै प्रमुख सचेतक रमेश लेखकले भने, ‘सरकारमा रहेका बहालवालामन्त्री समेत संलग्न रहेको हुँदा स्वतन्त्र, निष्पक्ष र विश्वसनीय छानबिनको सुनिश्चितताका निम्ति संसदीय छानबिन समिति गठन गर्नुपर्ने विषयमा स्वयं सत्तापक्षकै सांसदले पनि सरकारको ध्यानाकर्षण गरेका थिए । तर सरकार बहुसंख्यक सांसदले उठाएका जनसरोकारका यी विषयमा गम्भीर, सार्थक संवाद गरी निष्कर्षमा पुग्नुपर्नेमा बेवास्ता गर्दै संसद्बाट भाग्ने काम गरेको छ ।’
संसदीय दलको बैठकमा कांग्रेस सभापति शेरबहादुर देउवाले पनि उक्त मागलाई निरन्तर उठाइरहने स्पष्ट पारेका छन् । ‘यो लाखौं सहकारीपीडितको अर्बौं बचत हिनामिनाको विषय हो । यस्तो गम्भीर विषयलाई छल्ने उद्देश्यले सरकारले संसद् नै बन्द गर्ने निर्णय गरेको छ,’ देउवाले भने, ‘सरकार सहकारीपीडित र सुशासनको पक्षमा नरहेको तथा गैरजिम्मेवार रूपमा प्रस्तुत भएको पुष्टि हुन्छ । तर, कांग्रेस दृढतापूर्वक आवाज उठाइरहन्छ ।’
