१८ माघ, काठमाडौं – ३ अर्ब रुपैयाँभन्दा बढी ठगी गरेको आरोपमा २ भारतीय नागरिकसहित ७ जनालाई प्रहरीले पक्राउ गरेको छ।
केन्द्रीय अनुसन्धान ब्युरो (सीआईबी)ले डेढ वर्षदेखि संगठित रूपमा ठगी गर्दै आएका उनीहरूलाई नियन्त्रणमा लिएको हो।
पक्राउ पर्नेहरूमा कैलालीका २२ वर्षीय माइकल डंगौरा, २६ वर्षीय अनिल विश्वकर्मा, काठमाडौंका २१ वर्षीय पियुष श्रेष्ठ, दोलखाका १९ वर्षीय अश्विन चौलागाईं, रौतहटका २२ वर्षीय सत्यमकुमार सहनी रहेका छन्। त्यस्तै, भारतका ३६ वर्षीय मुन्ना कुमार र २७ वर्षीय रोशन कुमार पनि पक्राउ परेका छन्।
स्मार्ट तरिकाले ठगी, करोडौंको साइबर अपराध
सीआईबीका प्रवक्ता प्रहरी उपरीक्षक सुधिरराज शाहीका अनुसार पक्राउ परेका व्यक्तिहरू कम्प्युटर इन्जिनियरिङ अध्ययनरत विद्यार्थी हुन्, जसले आधुनिक प्रविधि दुरुपयोग गरी ठगी गर्दै आएका थिए। “डिजिटल फरेन्सिक अनुसन्धानअनुसार उनीहरूले ३ अर्ब रुपैयाँभन्दा बढी ठगी गरेको प्रमाण फेला परेको छ,” शाहीले जानकारी दिए।
उनीहरूले बैंक तथा डिजिटल वालेट प्रयोगकर्तालाई फोन गरेर आफूहरू सम्बन्धित बैंक वा वालेट कम्पनीका कर्मचारी भएको बताउँदै सिस्टम अपडेटका नाममा ओटीपी संकलन गर्ने र त्यसको दुरुपयोग गरी खाताबाट रकम चोरी गर्ने गरेको खुलासा भएको छ। साथै, सामाजिक सञ्जालमार्फत अनलाइन जागिरको लोभ देखाएर पीडितहरूका बैंक तथा वालेट खाता आफ्नो नियन्त्रणमा लिने र सोही माध्यमबाट अवैध कारोबार गर्ने गरेको पाइएको छ।
क्रिप्टोकरेन्सी कारोबारको संलग्नता, संगठित ठगीको आरोप
प्रहरीका अनुसार उनीहरूविरुद्ध संगठित रूपमा ठगी तथा अवैध डिजिटल मुद्रा (क्रिप्टोकरेन्सी) कारोबारको आरोपमा अनुसन्धान भइरहेको छ। सीआईबीले थप विवरण संकलन गर्दै ठगीको जालोमा संलग्न अन्य व्यक्तिहरूको खोजी गरिरहेको जनाएको छ।