६ माघ, रूपन्देही– सुप्रिम सहकारीको रकम अपचलन प्रकरणमा रवि लामिछाने, छविलाल जोशी, र लक्ष्मी पौडेलसहित ४२ जनाविरुद्ध रूपन्देही जिल्ला अदालतमा मुद्दा दायर गरिएको छ।
रवि, छवि र लक्ष्मीविरुद्ध सहकारी ठगी र संगठित अपराधमा १० करोड १९ लाख ३६ हजार रुपैयाँ बिगो मागसहित आइतबार पूरक अभियोग दर्ता गरिएको हो।
यसअघि दर्ता भएका २८ प्रतिवादीमध्ये १७ जनाविरुद्ध थप कसुर र बिगोको दाबी गरिएको छ। सरकारी वकिल कार्यालयका अनुसार, गितेन्द्रबाबु राईविरुद्ध ५१ करोड १ लाख ८३ हजार ८ सय ४२ रुपैयाँ बिगो माग गरिएको छ। संचालक दिनेश रोकालाई सहकारी ठगी, संगठित अपराध र सम्पत्ति शुद्धीकरण मुद्दामा मुछिएको छ।
प्रहरी अनुसन्धानले सुप्रिम सहकारीका १० हजार ३ सय ९१ जना बचतकर्ताको १ अर्ब ३१ करोड रुपैयाँ अपचलन भएको देखाएको छ। १ हजार ८ सय ७२ जनाको जाहेरीका आधारमा सरकारी वकिल कार्यालयले मुद्दा दर्ता गरेको हो। यसअघि २०८१ वैशाख ३ मा सुरु मुद्दामा २८ जनाविरुद्ध १ अर्ब ३ करोड बिगो दाबी गरिएको थियो।
रूपन्देही अदालतले आइतबार पूरक अभियोगलाई तीन घण्टामै रुजु गरी दर्ता गरेको हो।