४ माघ, काठमाडौं – प्रमुख प्रतिपक्षी दलका नेता तथा माओवादी केन्द्रका अध्यक्ष पुष्पकमल दाहालले वर्तमान सरकार आफ्नो औचित्य गुमाउँदै गएको दाबी गरेका छन्।
संसद् भवन नयाँ बानेश्वरमा आज आयोजित विपक्षी दलको पत्रकार सम्मेलनमा उनले सरकारका गतिविधिले जनतामा निराशा र असन्तुष्टि मात्रै बढाएको टिप्पणी गरे।
दाहालले कांग्रेस-एमाले गठबन्धनलाई अप्राकृतिक भन्दै यसको गठन नै संविधानको मर्म र भावनाविपरीत रहेको आरोप लगाए। “सरकारका क्रियाकलापले आम निराशा उत्पन्न गरेको छ। यो सरकार अपारदर्शी र अप्राकृतिक तरिकाले बनेको छ,” दाहालले भने।
उनले सरकारका गलत निर्णय र क्रियाकलापका कारण विपक्षी दलहरू एकजुट भएर विरोधमा उभिन बाध्य भएको स्पष्ट पारे। “देशको वर्तमान अवस्थाप्रति गम्भीर चिन्तासहित हामीले विरोध गरिरहेका छौं। आवश्यकता परे सडक संघर्षमा जान पनि पछि पर्ने छैनौं,” उनले चेतावनी दिए।
दाहालले यसै विषयमा १ माघमा सिन्धुपाल्चोकको सुकुटेमा आयोजित कार्यक्रममा पनि वर्तमान सरकारप्रति असन्तुष्टि व्यक्त गरेका थिए। उनले त्यतिबेला जनतामा सरकारप्रति कुनै भरोसा नभएको र कांग्रेसभित्र समेत चरम असन्तुष्टि रहेको बताएका थिए।
“जनता सरकारको कामप्रति असन्तुष्ट छन्। कांग्रेसभित्र पनि सरकारलाई लिएर गहिरो असन्तोष छ,” दाहालले भनेका थिए।
उनका अनुसार, संविधानको भावना विपरीत बनेको सरकारले देशको समस्यालाई समाधान गर्नुको सट्टा थप जटिलता सिर्जना गरिरहेको छ।