१९ मंसिर, काठमाडौं − जनकपुरधाम प्रवेशद्वार मानिने जनकपुर–ढल्केबर सिक्स–लेन सडकखण्डका तीन स्थानमा आकासेपुल निर्माण कार्य जारी छ।
पैदलयात्रीको भीड, सवारीको उच्च चाप, ट्राफिक व्यवस्थापनमा चुनौती र बढ्दो दुर्घटना जोखिमलाई कम गर्नका लागि यो परियोजना अघि बढाइएको सडक डिभिजन कार्यालयले जनाएको छ।
कार्यालयका अनुसार करिब १० करोड ५० लाख रुपैयाँ लागतमा सडकका अत्यधिक भीडभाडयुक्त र जोखिमपूर्ण तीन स्थान—लक्ष्मीनियाँ बजार, महिला विकास चोक (महेन्द्रनगर बजार) र सखुवा चोक—मा आकासेपुल निर्माण भइरहेका छन्। इन्जिनियर उज्जवल झाका अनुसार एक महिनादेखि तीनै ठाउँमा पिल्लरलगायत आधारभूत संरचना निर्माण भइरहेको छ र लक्ष्यअनुसार समयमै काम सकिने छ।
झाका अनुसार लक्ष्मीनियाँ बजारको पुल तीन करोड ४२ लाख रुपैयाँमा, महिला विकास चोकको तीन करोड ३५ लाख रुपैयाँमा र सखुवा चोकको पुल तीन करोड ४५ लाख रुपैयाँमा निर्माण भइरहेको छ। प्रत्येक पुलको उचाइ ५.६ मिटर, लम्बाइ २९.४ मिटर र चौडाइ ३ मिटर रहनेछ।
जिल्ला ट्राफिक प्रहरी प्रमुख प्रहरी निरीक्षक सूर्यबहादुर शाहीका अनुसार आकासेपुल बनेपछि जनकपुर–ढल्केबर सडकखण्डमा ट्राफिक व्यवस्थापन सहज हुनेछ, किनकि दैनिक हजारौँ पैदलयात्रु तथा सवारीसाधनको अविरल चापले दुर्घटनाको जोखिम उच्च छ।
क्षीरेश्वरनाथ उद्योग वाणिज्य संघका अध्यक्ष सुरेश यादवले जनकपुरधाम जाने भक्त तथा स्थानीयको चहलपहल धेरै हुने भएकाले पुल बनेपछि दुर्घटना नियन्त्रणमा सहयोग पुग्ने बताए। स्थानीय रोहितराज खनालले आकासेपुलले व्यस्त सडकको ट्राफिक व्यवस्थापन तथा सहरी सौन्दर्यकरण दुवैमा योगदान पुर्याउने बताए।
सडक डिभिजन कार्यालयले चालु आर्थिक वर्षमै निर्माण सक्ने लक्ष्य राखेको छ।
