शिर्षक अलि फरक छ । आकाशको सूर्यसँग पढाइको के सम्बन्ध ? भन्न सकिन्छ । पढ्न मन नलागेर पो अल्छी हुने हो, भन्न सकिन्छ । तर त्यति मात्र होइन ।
हिन्दु धर्ममा सूर्यतर्फ फर्केर प्रार्थना गर्ने गरिन्छ । त्यस प्रकारको प्रार्थनामा केही अन्धविश्वास छ र केही विज्ञान पनि । प्राचीन कालका मानिसहरूले सूर्यबाट केही ऊर्जा आएको तथा त्यसबाट केही रोग व्याधि सन्चो भएको आधारमा पनि सूर्यलाई शक्तिको रुपमा पूजा गरेको हुनसक्छ ।
सूर्यलाई हेला गर्दा म आफै केही दिनदेखि पढाइमा अल्छी भइरहेको अवस्था थियो । बिहानको कसरत पनि कोठाभित्रै गर्ने । पढ्ने लेख्ने, कम्प्युटर पनि कोठाभित्र चलाउने । अनि परिणाम, म बिस्तारै अल्छी हुँदै गए । त्यो कसरी भयो त ?
विभिन्न रोगहरू जाँच्दै जाँदा टीचिंगमा चर्म रोग विशेषज्ञ डा.सीमा सिटौलालाई पनि जँचाए । वहाँले भिटामिन डी जाँच गर्न भन्नु भयो । भिटामिन डिको लेबल ३० भन्दा माथि हुनुपर्नेमा मेरो १३ मात्र रहेछ । यसरी लेबल तल झरेपछि मांसपेशी दुख्ने, जोर्नीहरू दुख्ने र जे गर्दा पनि अल्छी मात्र लाग्ने हुँदो रहेछ ।
म किन अल्छी हुँदै गए भनेको, वैज्ञानिक कारण त्यसो पो रहेछ । अर्थात् हाम्रो पढाई लेखाई र मेहनत गर्ने कुरा, आकाशको सूर्यसँग सम्बन्धित रहेछ । आकाशको सूर्यलाई हेला गर्यो भने भिटामिन डी पाइँदो रहेनछ । अनि पढ्ने लेख्ने कुरामा पनि अल्छी भइँदो रहेछ । त्यसैले आकाशको सूर्यको वैज्ञानिक महत्वलाई कसैले पनि अवहेलना नगरौँ है ।
– समीर सिंह
