३१ बैशाख, काठमाडौं – एकीकृत समाजवादी अध्यक्ष माधवकुमार नेपालले प्रतिनिधि सभा र प्रदेश सभा सबै त्रिसङ्कु भएको र सबैतिर गठबन्धन सरकार बनाउनु पर्ने अबस्था भएकाले सरकारको स्थिरतामा प्रश्न उठेको बताएका छन् ।
पार्टीको सोमबार बसेको पोलिटव्यूरो बैठकमा राजनीतिक प्रतिवदेन प्रस्तुत गर्दै अध्यक्ष माधवकुमार नेपालले सरकारको स्थिरतामा प्रश्न उठेको उल्लेख गरेका हुन् ।
‘प्रतिनिधि सभा र प्रदेश सभा सबै त्रिसङ्कु भएको र सबैतिर गठबन्धन सरकार बनाउनु पर्ने अबस्था भएकाले सरकारको स्थिरतामा प्रश्न उठिरहने अवस्था छ’ बैठकमा प्रस्तुत गरेको राजनीतिक प्रतिवेदनमा भनिएको छ, ‘वर्तमान पाँच दलीय गठबन्धनमा रहेका राजनीतिक दलहरूको वर्गाधार, वर्ग चरित्र र दृ ष्टिकोण फरक फरक भएता पनि संविधानको पूर्ण कार्यान्वयन, लोकतन्त्रको रक्षा र मुलुकमा राजनीतिक स्थिरता कायम गर्दै मुलुकलाई संविधानले निर्देश गरेको समाजवाद उन्मुख दिशामा अगाडि बढाउने सवालमा सहमत भएर गठबन्धनमा रही सहकार्य गरिरहेका छन् । साझा सहमतिका आधारमा सरकार निर्माण गरी सञ्चालन गरिरहेका छन् ।’
उनले मुलुकमा भएका घटनाक्रमले गठबन्धन भत्किने र बन्ने क्रम चलिरहेको बताएका छन् । ‘सन्तुलनका आधारमा आज जे जस्ता राजनीतिक कार्यहरू भैरहेका छन् यो नै आजको तात्कालिक राजनीतिक परिस्थिति हो’ नेपालको प्रतिवेदनमा भनिएको छ, ‘निर्वाचनबाट प्रतिनिधि सभा र प्रदेश सभा कहिं पनि कु नै एक राजनीतिक दलको बहुमत नआएको हुनाले संघ र प्रदेश सबैमा गठबन्धन सरकार बनाउनु पर्ने बाध्यात्मक अवस्था छ । त्यसले गर्दा गठबन्धन बन्ने र भत्कने क्रम चलेको छ ।’
