१० बैशाख, काठमाडौं – सत्ता साझेदार प्रमुख दल एमालेले सहकारीको रकम अपचलनका गम्भीर अपराधलाई निष्पक्ष छानबिन गरी दोषीलाई कानुनको कठघरामा ल्याउन र बचतकर्ताको रकम सुरक्षित फिर्ता गराउन सरकारसँग माग गरेको छ ।
ललितपुरको गोदावरीमा दुई दिन चलेको महाधिवेशन प्रतिनिधि परिषद् बैठकबाट १४ बुँदे समसामयिक राजनीतिक प्रस्ताव पारित गर्दै एमालेले सहकारीका बचतकर्ताको रकम सुरक्षित फिर्ता गराउन माग गरेको हो ।
‘देशका केही सहकारीहरूमा गम्भीर समस्या र बेथिति देखापरेका छन् । जनताले दुःख गरेर जम्मा गरेको अर्बौं रकम सीमित व्यक्तिले हिनामिना गरेर फरार हुने र बचतकर्ताह सडकमा अलपत्र पर्ने स्थिति पैदा भएको छ । लघुवित्तका ऋणिहरू पनि समस्यामा परेका छन् । मिटरब्याज पीडितका समस्या पनि पूर्ण रूपले समाधान भएका छैनन्,’ प्रस्तावमा उल्लेख छ, ‘सहकारीमा पैदा भएका यस प्रकारका गम्भीर समस्या र सर्वसाधारणको रकम अपचलनका गम्भीर अपराधलाई निष्पक्ष छानबिन गरी दोषीलाई कानुनको कठघरामा ल्याउन र बचतकर्ताको रकम सुरक्षित फिर्ता गराउन सरकारसँग माग गर्दछ ।’
त्यस्तै बैठकले आर्थिक मन्दी, भ्रष्टाचार र कुशासन, राज्य सञ्चालनमा व्याप्त बेथिति एवं मूल्यमान्यताहरूको भयावह स्खलनका कारणले समाजमा चौतर्फी नैराश्य बढेको निष्कर्ष निकालेको छ । ‘अर्थतन्त्रलाई चलायमान गर्न, निजी क्षेत्रले भोग्नुपरेका समस्याको तत्काल समाधान गर्दै व्यवसायीहरूमा आत्मविश्वास र भरोसा जागृत गर्न, युवाहरूमा यो देश बन्छ र देश हामीले नै बनाउँछौं भन्ने सकारात्मक ऊर्जा र मनोबल पैदा गर्न विशेष योजना निर्माण गरी अगाडि बढ्न वर्तमान सरकारलाई यो बैठक आह्वान गर्दछ’ एमालेले भनेको छ ।
यसैगरी बैठकले ‘भ्रष्टाचारका विरुद्ध सम्झौताहीन ढङ्गले प्रस्तुत हुन, यसका विरुद्ध जेहाद छेड्न र कानुनका नजरमा सबै बराबर छन् भन्ने कुरा व्यवहारबाटै प्रमाणित गर्न’ सरकारसँग माग गरेको छ ।
