४ चैत्र, धनगढी – नागरिक उन्मुक्ति पार्टीको सुदूरपश्चिम संसदीय दलको बैठकले प्रदेश सरकारलाई दिएको समर्थन कायम राख्ने भएको छ ।
पार्टीको संसदीय दलका नेता घनश्याम चौधरीको अध्यक्षतामा आइतबार बसेको बैठकले समर्थन कायम राख्ने निर्णय गरेको हो ।
बैठकपछि पत्रकारसँग कुरा गर्दै प्रदेश सरकारका आर्थिक मामिलामन्त्रीसमेत रहेका दलका नेता चौधरीले भने, ‘हामी अहिले पनि यही सरकारमा छौँ, यसलाई कायमै राखेर जाने निर्णय भएको छ’ ।
बैठकमा नागरिक उन्मुक्तिका सात प्रदेश सांसदमध्ये पाँचजनाको उपस्थिति रहेको थियो। उपस्थित पाँचैजना प्रदेश सरकारका मन्त्री हुन्। बैठकमा सांसद कैलाश चौधरी र टीका थापा भने अनुपस्थित थिए। दुवैजना उपचारका लागि काठमाडौं गएकाले बैठकमा सहभागी हुन नसकेको दलका नेता चौधरीले दाबी गरे।
प्रदेश सरकारलाई समर्थन गर्ने विषयमा नागरिक उन्मुक्तिभित्र तीव्र विवाद छ। अध्यक्ष रञ्जिता श्रेष्ठले प्रदेश सरकारबाट फिर्ता हुन संसदीय दललाई गत साता निर्देशन दिएकी थिइन्। पार्टीका संरक्षकसमेत रहेका उनका पति रेशम चौधरी भने प्रदेशमा समर्थन कायम गरेर जानुपर्ने पक्षमा छन्।
पार्टी अध्यक्षको निर्देशनबारे सोधिएको प्रश्नमा दलका नेता चौधरीले संसदीय दलको अधिकार प्रयोग गरेर समर्थन कायम राख्ने निर्णय गरिएको बताए। ‘जनताको हितका लागि पार्टी गठन भएको हो, जनताकै हितका लागि दललाई दिएको अधिकार प्रयोग गरेर निर्णय गरेका हौँ,’ उनले भने।
नागरिक उन्मुक्तिले समर्थन कायम राख्ने निर्णय गरे पनि मुख्यमन्त्री कमलबहादुर शाह अल्पमतमै छन्। प्रदेश सभामा एक सांसद रहेको राप्रपा र स्वतन्त्र सांसदले समर्थन गरेको अवस्थामा भने सरकारको पक्षमा बहुमत पुग्छ। ५३ सदस्यीय प्रदेश सभामा बहुमतका लागि २७ सिट आवश्यक पर्छ। सत्तापक्षमा अहिले कांग्रेसका १८ र नागरिक उन्मुक्तिका सात गरी २५ सदस्य छन्।
