१० पुस, काठमाडौं — रास्वपा सभापति रवि लामिछानेसँग करिब ६ घण्टा लामो छलफलपछि काठमाडौं महानगरपालिकाका मेयर बालेन साहले आफ्नै राजनीतिक दल गठन गर्ने तयारी तीव्र पारेका छन् । रविसँग ठोस सहमति जुट्न नसकेपछि बालेनले आफ्नै नेतृत्वमा पार्टी बनाएर निर्वाचनमा जाने दिशामा गृहकार्य थालेका हुन् ।
सभापति लामिछानेको मुख्य उद्देश्य बालेनलाई रास्वपामै समेट्ने रहेको बुझाइ बनेपछि बालेनले कांग्रेस, एमालेसहित विभिन्न दलमा रहेका लोकप्रिय अनुहार तथा सामाजिक सञ्जाल र जनताबीच चिनिएका व्यक्तिहरूलाई साथमा लिएर अघि बढ्ने रणनीति बनाएका छन् ।
बालेनका स्वकीय सचिवालयका भूपदेव शाह, सुनिल लम्साललगायतले विभिन्न दलका चर्चित युवा नेताहरूसँग फोनमार्फत ‘एकपटक मेयरसँग भेटेर छलफल गरौँ’ भन्दै प्रस्ताव राखिरहेको बताइएको छ ।
बालेनको टोलीले बुधबार दिनभर विभिन्न व्यक्तिहरूसँग संवाद गरेको थियो र यो प्रक्रिया आज पनि निरन्तर रहेको छ । लौरो चिन्हबाट चुनाव लड्ने तयारीसहित समानुपातिकतर्फका सम्भावित उम्मेदवारको सूची संकलन भइरहेको बालेननिकट स्रोतले जनाएको छ ।
यस क्रममा बालेनले जनमत पार्टीका अध्यक्ष सीके राउत, नागरिक उन्मुक्ति पार्टीका संस्थापक रेशमलाल चौधरी, कान्तिपुर मिडिया ग्रुपका प्रबन्ध निर्देशक सम्भव सिरोहिया र विवेकशील साझाका मिलन पाण्डेलगायतसँग पनि छलफल गरेका छन् ।
विभिन्न समुदायभित्र उद्यम, सामाजिक सेवा वा सार्वजनिक छविबाट स्थापित केही पपुलिस्ट व्यक्तिहरूलाई समेट्ने सूची बनाउने काम जारी रहेको छ । देशव्यापी रूपमा बालेनको प्रभाव रहेकाले रवि लामिछानेभन्दा आफ्नै नाममा बढी मत आउने अनुमान उनका सहयोगीहरूको छ ।
यसबीच बालेनले राप्रपा प्रवक्ता ज्ञानेन्द्र शाहीदेखि रिपोर्टर्स क्लबका अध्यक्ष ऋषि धमलासम्मसँग भेटघाट गरेका छन् । रवि लामिछानेसँग मिलेर एउटै पार्टीमा जाने सम्भावना पूर्ण रूपमा टुंगिएको छैन, तर अन्तिम निष्कर्ष आउन बाँकी रहेको उनका सहयोगीहरूले बताएका छन् । सामाजिक सञ्जालमा सक्रिय पूर्वसचिव भीम उपाध्यायदेखि कलाकार निश्चल बस्नेतसम्म बालेनको भेलामा सहभागी भएका थिए ।
