१३ पुस, काठमाडौं — साताको पहिलो कारोबार दिन आइतबार सेयर बजारको मापक नेप्से परिसूचक दोहोरो अंकले उकालो लागेको छ। अघिल्ला दुई कारोबार दिन सामान्य वृद्धि देखिएको नेप्से आइतबार ४७.५५ अंकले बढेको हो।
गत बिहीबारको तुलनामा १.८३ प्रतिशतले वृद्धि भएसँगै नेप्से परिसूचक २ हजार ६ सय ३३.४२ विन्दुमा पुगेको छ। चार कारोबार दिनपछि नेप्से पुनः २६ सय विन्दु माथि उक्लिएको हो। यसअघि गत आइतबार १९.९२ अंकले घटेर नेप्से २ हजार ५ सय ९५.१० विन्दुमा झरेको थियो।
आइतबार २३८ कम्पनीको सेयर मूल्य बढ्दा २१ कम्पनीको मूल्य घटेको छ। कारोबारमा आएका १३ वटै उपसमूहमा हरियाली देखिएको छ, जसमा निर्जीवन बिमा, उत्पादन तथा प्रशोधन, होटल तथा पर्यटन समूह अग्रस्थानमा रहे।
दिनभर ८९ हजार २५१ पटकको कारोबारमार्फत १ करोड ३४ लाख ६८ हजार १४५ कित्ता सेयर किनबेच भएको छ। सो कारोबारबाट कुल ५ अर्ब ५३ करोड १३ लाख रुपैयाँ बराबरको कारोबार भएको छ।
अघिल्लो कारोबार दिनको तुलनामा कारोबार रकममा उल्लेख्य वृद्धि भएको छ। गत बिहीबार सेयर बजारमा ३ अर्ब २२ करोड ४६ लाख रुपैयाँ बराबरको कारोबार भएको थियो।
